DAR WACHEKELEA TRENI

USAFIRI wa treni ndani ya Jiji la Dar es salaam umeanza rasmi  leo na kupokelewa kwa furaha .

Treni  hiyo inatarajiwa kuwa mkombozi wa  tatizo la usafiri katika maeneo mbalimbali ya Jiji la Dar es salaam.

Kuanza kwa usafiri huo, ni utekelezaji wa ahadi ya Waziri wa Uchukuzi, Dk Harrison Mwakyembe, katika kikao cha Bunge cha bajeti ambapo alisema usafiri huo ungeanza Oktoba mwaka huu na hivyo kupungua adha ya usafiri kwa wananchi wa Jiji la Dar es salaam.

Uzinduzi wa safari hiyo  uliofanywa kwa njia mbili, ya kwanza kuanzia Ubungo hadi Stesheni chini ya  Kampuni ya Reli Tanzania (TRL) na nyingine kuanzia Mwakanga hadi Kurasini.

Treni hiyo iliyokuwa na mabehewa sita likiwemo moja lililotengwa maalumu kwa ajili ya wanafunzi, ilionekana kufurahiwa  na wananchi waliokuwa wamepanda kutokana na utulivu  uliokuwamo ndani yake huku ukisindikizwa na burudani za muziki na matangazo kutoka kwa wahudumu waliokuwemo ndani ya kila behewa.

Akizungumza mara baada ya kuzindua usafiri wa treni itokayo Ubungo hadi Stesheni, Waziri Mwakyembe  aliwataka wafanyakazi wa Shirika hilo kuweka pembeni kero zao na kuongeza nguvu katika maboresho ya usafiri huo kwa lengo la kuliletea tija Taifa.

Alisema ujio wa usafiri huo ni maendeleo makubwa kwa uchumi wa Jiji la Dar es salaam na Taifa kwa ujumla kwa kuwa utaongeza ufanisi katika utoaji huduma za usafiri . 

Nauli ya usafiri huo ni Sh 400 kwa kila mtu mzima na Sh 100 kwa mtoto au mwanafunzi kwa treni ya Ubungo hadi Stesheni huku treni ya Tazara ikitoza Sh 500 kwa mtu mzima na Sh 100 kwa mtoto au mwanafunzi.