kimataifa

Hair Food

TANGAZO

TANGAZO

IMETOSHA

IMETOSHA

Tuesday, 21 February 2017

NENDA FUNDI TIMU ZETU NDIVYO ZILIVYO

Makonda, Kamanda Sirro Waitwa Mahakamani Leo Kutokana na Kesi Aliyifungua Mbowe

Mkuu wa Mkoa wa Dar es Salaam (RC), Paul Makonda, Kamanda wa Polisi Kanda Maalumu Dar es Salaam (ZPC), Kamishna Simon Sirro na Mkuu wa Upelelezi wa kanda hiyo (ZCO), Camilius Wambura, wamepelekewa barua za mwito za kuwataka wafike Mahakama Kuu Kanda ya Dar es Salaam leo.

Viongozi hao wamepelekewa mwito huo kutokana na kesi ya Kikatiba iliyofunguliwa na Mwenyekiti wa Chadema Taifa, Freeman Mbowe dhidi yao.

Mbowe amefungua kesi hiyo kupinga Makonda kumtaja katika orodha yake ya watuhumiwa 65 wanaojihusisha na dawa za kulevya katika awamu ya pili na kumtaka afike katika Kituo Kikuu cha Polisi, Februari 10 mwaka huu, kwa ajili ya mahojiano.

Katika kesi hiyo Namba Moja ya Mwaka 2017, Mbowe pamoja na mambo mengine, anapinga mamlaka ya RC kumkamata kwa kile anachokiita kudhalilisha watu.

Kesi hiyo imepangwa kutajwa leo na itasikilizwa na jopo la majaji watatu, Sekieti Kihiyo ambaye ni kiongozi wa jopo hilo, akisaidiana na Jaji Lugano Mwandambo na Jaji Pellagia Kaday.

Mbowe anaiomba mahakama hiyo itamke kuwa vifungu vya Sheria ya Tawala za Mikoa na Serikali za Mitaa vinavyowapa mamlaka wakuu wa mikoa na wakuu wa wilaya kuwakamata watu na kuwatia mbaroni viko kinyume cha Katiba.

Aidha, Mbowe ambaye pia ni Mbunge wa Hai mkoani Kilimanjaro na Kiongozi wa Kambi ya Upinzani Bungeni, jana alifungua maombi mahakamani hapo akipinga kusudio la Kamanda Sirro la kumkamata kama hatajisalimisha katika kituo cha polisi kwa mahojiano.

Mahakama hiyo imetoa hati za mwito wa kufika mahakamani hapo kwa wadaiwa hao ambao ni Makonda, Sirro na Wambura. Hata hivyo, inadaiwa Kamanda Sirro alikataa kupokea mwito huo akielekeza kuwa hati hiyo ya mwito ipelekwe kwa Wambura.

Wadaiwa kukataa kusaini 
Kwa mujibu wa Ofisa wa mahakama, Yusuph Juma ambaye alipeleka mwito huo, alidai kuwa baada ya kuelekezwa na Kamanda Sirro kuwa ampelekee mwito huo Wambura, alipokwenda kwa Wambura, hakumkuta.

Juma alidai hati ya mwito wa mkuu wa mkoa alipoupeleka hakumkuta na kwamba wasaidizi wake nao walikataa kuusaini mwito huo.

Mwishoni mwa wiki, Kamanda Sirro akizungumza na waandishi wa habari alimtaka Mbowe ajisalimishe mwenyewe kituo cha Polisi na kwamba kama hatafanya hivyo basi watamsaka popote alipo na kumtia mbaroni.

Katika maombi hayo, Mbowe anaiomba mahakama iwazuie wadaiwa kutekeleza azma yake ya kumtia mbaroni pamoja na mambo mengine akidai kuwa kuna kesi ya kikatiba ambayo tayari ameifungua mahakamani hapo.

Katika maombi hayo, Mbowe anaiomba mahakama hiyo pia itoe amri ya kuwazuia kumkamata hadi hapo kesi hiyo ya kikatiba itakapomalizika na kwamba Mahakama Kuu imwachie na polisi wasiendelee na mchakato wowote dhidi yake hadi hapo kesi hiyo itakapomalizika.

Katika kesi ya Msingi ya Kikatiba, Mbowe anapinga kitendo cha Polisi kumtaka afike kituoni kwa madai kuwa ni utekelezaji wa amri ya Mkuu wa Mkoa.

Anadai kuwa sheria inayompa Mkuu wa Mkoa mamlaka ya kutoa amri ya kumkamata na kumweka ndani mtu iko kinyume cha Katiba kwa madai kuwa ilitungwa katika mazingira ambayo hapakuwa na vituo vya polisi vya kutosha.

Anadai kuwa kwa mazingira ya sasa sheria hiyo imeshapitwa na wakati na anaiomba mahakama itamke kuwa ni kinyume cha Katiba.

Mbowe pia anadai kuwa hata kama Mkuu wa Mkoa alikuwa anatekeleza mamlaka yake kwa mujibu wa sheria hiyo, basi hakutimiza matakwa ya kisheria, ambayo ni pamoja na kutoa taarifa kwa Hakimu wa Mahakama ya Wilaya au ya Hakimu Mkazi.

Vile vile, anaiomba mahakama kama itaona kuwa Mkuu wa Mkoa alikuwa sawa kutoa amri hiyo basi imwamuru afuate matakwa ya kisheria, ikiwa ni pamoja na kulinda haki za binadamu katika kutekeleza madaraka yake hayo.

Tundu Lissu: Serikali Ina Hofu Na Mimi TLS

Mwanasheria Mkuu wa Chama cha Demokrasia na Maendeleo(CHADEMA), Tundu Lissu, amesema ameanza kuogopwa na viongozi wa serikali  baada ya jina lake kuwa miongoni mwa majina matano bora ya wagombea wa nafasi ya urais katika Chama cha Wanasheria Tanganyika (TLS) kutokana na misimamo yake ya kuitetea Katiba ya Tanzania.

Akizumgumza na waandishi wa habari  Mwanza jana, Lissu alisema  tangu atangaze nia yake ya kugombea urais wa TLS ameanza kuogopwa  kutokana  na kujulikana kwa   misimamo yake kuhusu  masuala ya   sheria,  siasa na  katiba ya nchi hii.

Alisema TLS ina majukumu makubwa katika nchi ya kulinda utawala wa sheria na wanasheria ndiyo wanaojua kuliko mtu yeyote  zinapotungwa sheria mbovu na zile za kikandamizaji, pia wao ndiyo wanapaswa kuwa wa kwanza kuanza kuzipigia kelele sheria hizo.

“Kwa miaka mingi  TLS imeongozwa  na watu ambao hawafikiri kwamba wajibu wao wa kwanza kulinda utawala wa sheria,  wao wanafikiri wajibu wao wa kwanza ni kuwapendeza  wanasiasa na matokeo yake TLS imepotea, wanachoogopa  ni kwamba hii raha ambayo wameipata miaka yote hii wakati  wanasheria wa  TLS wakiwa  usingizini akija huyu Lissu itaisha,” alisema Lissu.

Alisema aligombea nafasi hiyo  baada ya kumsikia Rais Dk. John Magufuli akizungumza mbele  ya watanzania kwamba wakili  yeyote  atakayewatetea  watuhumiwa wanaokutwa na  dawa ya kulevya au nyara za serikali wakamatwe na kuwekwa ndani.

Alisema aliposikia kauli hiyo alicheka na kusema sasa ni wakati wa yeye kuwa rais wa TLS ili kauli za aina hiyo zikome na siku mbili kabla ya Rais Dk. John Magufuli kutoa kauli hiyo,  Bunge lilipitisha sheria ya msaada wa sheria.

“Sheria hiyo inasema mtu yeyote anayefunguliwa kesi ya jinai, au madai kama ni maskini hana uwezo wa kumlipa wakili atapatiwa huduma hiyo na wakili atalipwa  na  mtendaji mkuu wa mahakama.

“Sheria hiyo inampatia haki  mwananchi yeyote atakayekuwa  na kesi ya mauaji, pembe za ndovu au dawa za kulevya  kupata wakili atakayelipwa na serikali.

“Siku mbili baadaye Rais anakinzana na sheria hiyo nilishangaa kweli.  Tayari sheria hiyo imetungwa  ni jambo muhimu kweli kwa sababu katika  nchi hii watu wanasingiziwa sana, kwenye maegereza nyingi   nchini wamejazana wananchi ambao hawana hatia na wapo huko kwa sababu hawakuwa na mawakili wa kuwatetea,” alisema Lissu.

Lissu alisema  endapo atachaguliwa kuwa rais wa TLS atahakikisha sheria ya msaada wa  sheria  inatekelezwa.

Kuhusu hoja ya  Waziri wa katiba na  Sheria, Dk. Harrison Mwakyembe ya kutishia kukifuta chama hicho hicho kwa kuwa kimeanza kujiingiza katika masuala ya siasa, Lissu alisema wanaoleta hoja za kutaka kukifuta chama hicho kama ni wanasheria ujuzi wao wa sheria ni wa shaka lakini kama ni wasiojua sheria wanasamehewa.

Alisema  sheria ya iliyoanzisha TLS inasema mwanachama yeyote aliyekidhi vigezo  vya chama hicho ana haki ya kuwa mgombea wa nafasi yoyote ya uongozi na haijasema  ukiwa mwanachama wa chama chochote cha siasa unapungukiwa sifa  ya kugombea.

“Watu wanazungumza   kana kwamba ni makosa mwanasheria kuwa mwanasiasa, katika nchi hii katiba imeruhusu  siasa za vyama vingi, kuwa wanachamaau  kiongozi wa chama.

“Kuwa tu mwanachama una kuwa na fursa ya kugombea nafasi mbalimbali za uongozi serikalini lakini sasa watu wanataka kuaminishwa kuwa ukiwa mwanasiasa huna haki,” alisema

Monday, 23 January 2017

MBEYA WALICHANGAMKIA SHINDANO LA SHINDA NYUMBA


Na Derick Lwasye, Mbeya 
SHINDANO la shinda nyumba na Global Publisher awamu ya pili limepokelewa kwa vizuri na wasomaji wa Magazeti ya Global Publisher Kampuni namba moja ya uchapishaji wa Magazeti Tanzania.

Hii ni mara ya pili kwa Shindano hili la shinda nyumba kufanyanyika, huku awamu ya kwanza akipatikana mshindi wa mjengo wenye thamani ya mamilioni kutoka mkoani Iringa, Nelly Mwangosi.

Wakizungumza na Championi wakati wa promosheni ya Shindano hilo lililofanyika kwenye maeneo Mbalimbali ya viunga vya jiji la Mbeya, wasomaji hao walisema wana uhakika na kile kinachofanywa na Global Publisher tofauti na makampuni mengine ambayo yanaonekana kumwandaa mshindi.

"Siyo siri ninyi jamaa Mkoa vizuri sana na hamna magumashi kwenye bahati Nasibu zenu, hivyo nimejipanga kununua kopi nyingi za magazeti ya Global Publisher ili nijitengenezee mazingira mazuri ya kuibuka mshindi "alisema Mussa Hassan ambaye ni Dereva Bajaji kwenye Kituo cha Kabwe.

Rodrick Robin maarufu kama mzee wa ijumaa wikienda, alisema huu ndiyo wakati wa kujaribu bahati yake kutokana na kuwa mteja mzuri wa Gazeti la Ijumaa ambalo huwa limesheheni Hadithi zenye msisimko.

"Nimekuwa mteja wa muda mrefu wa wa Magazeti ya ya Global Publisher ila nilikuwa sitilii maanani Mashindano yaliyokuwa yakiendeshwa kutokana na kutoamini kama mshindi anapatikana bila kupangwa, ila baada ya kuona mshindi wa awamu ya kwanza kapatikana kutoka Iringa tena ni mwanamke mjasiliamali nikashawishika sana, na sasa tutakula sahani moja mpaka kieleweke "alisema

Katika eneo la Nanenane ambapo ndiyo kuna stand ya mabisa ya wilayani na mikoani, wasomaji wa magazeti ya Global Publisher walionekana kufurahia awamu hii ya pili ya shinda Nyumba na Global Publisher.

Kwa upande wao wauza magazeti wa jiji la Mbeya na nyanda za juu kwa ujumla wamewataka Mawakala wa magazeti ya Global Publisher kuagiza Nakala nyingi ili kuepusha usumbufu kama ulivyojitokeza awamu ya kwanza ya Shindano hili.

"Unajua Shindano hili ni Shindano kubwa sana hapa Tanzania, hivyo kila mtu atataka kujaribu bahati yake, tunawaomba mawakala wajitahidi kuagiza nakala za kutosha ili kuwaondolea usumbufu wasomaji na wateja wetu, msimu uliyopita kulikuwa na uhaba wa nakala, hivyo kuna baadhi ya wasomaji walikuwa wanakosa nakala.

Maeneo mengine ambayo promosheni hiyo ilifanyika ni Mbalizi, Uyole, Mwanjelwa, Soweto, Iyunga na Sokomatola. 

MABONDIA NANE KUZICHAPA MATEMA BEACH SIKU YA IJUMAA 

Na Derick Lwasye, Mbeya Mpambano mkali wa masumbwi usiyokuwa wa ubingwa unatarajia kufanyika ijumaa ya wiki hii katika ukumbi wa Matema Beach wilayani kyela.

Mpambano huo unahusisha mabondia nane kutoka wilaya za Kyela, Rungwe na Mbeya mjini kwenye uzito wa middle weight.

Katika pambano la kwanza, Bondia Maisha samson maarufu kama Kyela one kutoka kyela atapambana na Alex Mwakibete toka wilaya ya Rungwe, Mchezo huo utakuwa wa raundi kumi.

Mapambano mengine yatakuwa kati ya Bondia Six Mashine na Boniphace toka mbeya,Moses Mwamlanda atazichapa na mwakabyabya(mataslim)wote kutoka wilayani kyela, mapambano yatakuwa ya raundi nane. Mpambano wa mwisho ni kati ya Joshua Milton  dhidi Shaban Mwampela nao utakuwa wa raundi nane.

Akizungumza na Championi mratibu wa mapambano hayo James Mwakyembe, alisema maandalizi yamekamilika na mapambano hayo yamedhaminiwa na Kituo cha Radio cha Kyela FM.

"Maandalizi yamekamilika na siku ya alhamisi itakuwa siku ya kupima uzito kabla ya kupanda ulingoni siku inayofuata ya ijumaa. Lengo hasa la kuandaa mapambano haya ni kutaka kuinua mchezo huu wa ngumi ambao ulianza kupotea hapa wilayani Kyela "alisema Mwakyembe.

Mikataba 9 Iliyosainiwa na Serikali ya Tanzania na Uturuki Leo

Na Beatrice Lyimo-MAELEZO

Serikali ya Tanzania na Serikali ya Uturuki zimesaini mikataba tisa ya makubaliano ya kiuchumi inayolenga katika kuimarisha uhusiano na ushirikiano wa maendeleo baina ya nchi hizo.

Mikataba hiyo inahusisha sekta za uchukuzi, mawasiliano, habari, elimu, utalii, utafiti, viwanda, afya na ulinzi.

Akizungumza mara baada ya kusaini kwa mikataba hiyo  leo Ikulu Jijini Dar es Salaam, Rais wa Jamhuri ya Muungano wa Tanzania, Dkt. John Magufuli alisema ujio wa Rais wa Uturuki na ujumbe wake ni kielelezo cha ukuaji wa mahusiano baina ya Tanzania na Uturuki katika nyanja ya biashara na kimaendeleo baina nchini hizo.

Rais Magufuli alisema katika mazungumzo yake aliyofanya na Rais Recep Erdogan kuhusu ujenzi wa Reli ya Standard Gauge nchini, alimjulisha kiongozi huyo kuwa miongoni mwa wakandarasi walioomba zabuni ya ujenzi wa reli hiyo kuwa ni kampuni kutoka Uturuki, hivyo endapo itashinda zabuni hiyo itasaidia kukuza uhusiano uliopo baina ya nchi hizi mbili.

Aidha, Rais Magufuli alisema kuwa, Serikali ya Tanzania inatarajia kuomba  mkopo kupitia Benki ya Exim ya Uturuki katika kujenga sehemu ya kipande cha ujenzi wa reli hiyo.

Rais magufuli alisema Tanzania inaendelea kunufaika na uwepo wa Shirika la Ndege la Uturuki kwa kufanya safari zake za moja wka moja kutoka nchini Uturuki, kwa kuwa utasaidia kuongezeka kwa idadi ya watalii nchini na hivyo kukuza uchumi wa nchi hizo.

Kwa upande wake Rais wa Uturuki, Recep Erdogan alisema kuwa uwepo wa mikataba hiyo baina ya Tanzania na Uturuki itasaidia kupata matokeo mazuri ya uhusiano pamoja na fursa mbalimbali za ushirikiano katika nyanja ya Kilimo, Utalii, Ulinzi, Reli ambazo zitawezesha kukuza uchumi wa mataifa hayo.

Rais Erdogan alisema kuwa Uturuki imelenga kukuza ushirikiano uliopo baina yake na  Tanzania kupitia makongamano ya wafanyabiashara yenye malengo ya kukuza uchumi, kuongeza ajira pamoja na kukuza ujasiriamali baina ya Tanzania na Uturuki.

“Kiwango cha Biashara ya uwekezaji katika nchi ya Uturuki ni Dola za kimarekani 150 ambapo lengo letu ni kufika Dola za kimarekani 500,” alisema Rais huyo.

Aidha Rais Erdogan alisisitiza kuwa kufanya kazi kwa pamoja kutasaidia nchi hizi kusonga mbele na kufanikiwa katika nyanja mbalimbali.

Nae Waziri wa Maliasili na Utalii Prof. Jumanne Maghembe alisema kuwa makubaliano ya mkataba baina ya Tanzania na Uturuki katika Sekta ya Utalii yatasaidia katika kutangaza vivutio vilivyopo nchini, kubadilishana wataalamu, kubadilishana taarifa na kuongeza idadi ya watalii nchini.

Prof. Magembe aliongeza kuwa makubaliano hayo yatakuza sekta ya utalii katika kuvutia uwekezaji wa katika maeneo ya hoteli, fukwe na mbuga za wanyama zilizopo nchini

Thursday, 22 December 2016

TAMKO LA PAMOJA KULAANI KITENDO CHA KUWEKWA KIZUIZINI MWANDISHI WA HABARI WA KITUO CHA ITV KHALFAN LIUNDI MKOANI ARUSHA

Mtandao wa Watetezi wa Haki za Binadamu Tanzania (THRDC), Baraza la Habari Tanzania (MCT) pamoja na Umoja wa Vilabu vya Waandishi wa Habari Tanzania (UTPC) , tumesikitishwa na vitendo vinavyoendelea nchini,   chini ya uratibu  wa baadhi ya viongozi wa serikali za Mitaa ( hasa Wakuu wa Wilaya) vya kutaka kunyamazisha ama kuzuia kabisa waandishi wasifanye kazi zao kwa uhuru.  Matukio kadhaa yanaonyesha kuwa uhuru wa waandishi wa habari kutafuta na kutoa habari umezidi kubinywa na kujenga hofu miongoni mwa wanahabari kwa kipindi cha mwaka mmoja sasa toka viongozi wapya waingie madarakani.

Mwandishi wa habari wa kituo cha Televisheni (ITV), Bwana Khalfan Liundi ameendelea kushikiliwa na Polisi Wilayani Arumeru kwa amri ya Mkuu wa Wilaya hiyo Alexander Mnyeti toka tarehe 21/12/2016 hadi hivi sasa tunapotoa tamko hili bila kifikishwa mahakamani. Taarifa za awali kutoka Arusha zinaonyesha kuwa Mkuu wa Wilaya ya Arumeru hakupendezwa na taarifa iliyorushwa na ITV tarehe 20/12/2016 na kuonyesha wananchi waliokuwa wakiandamana kudai haki yao ya kupata maji. Kwa mujibu wa wandishi wa habari mkoani Arusha mwandishi huyu amekamatwa kwa kutoa taarifa hiyo ya maji ambayo kwa mujibu wa Mkuu wa Wilaya inaonekana kuwa ni ya kichochezi.

Matukio ya viongozi wa Serikali za Mitaa hasa Wakuu wa Wilaya kutishia na kutoa amri waandishi kuwekwa kuzuizini wanapotoa taarifa toka maeneo yao ya kazi yamefikia zaidi ya matano toka January 2016.  Kwa mujibu wa Sheria ya Wakuu wa Mikoa na Wilaya ya mwaka 1962 na Sheria ya Serikali za Mitaa zilizokuwa pia zinaumika kipindi cha mkoloni Mkuu wa Wilaya au Mkoa ana mamlaka ya kuamrisha polisi kumweka mtu yoyote kuzuizini na kumlaza rumande na kesho yake kumwachia bila mashtaka yoyote. Yafuatayo ni baadhi ya Matukio ya kutiwa kizuizini kwa waandishi wa habari kwa amri za wakuu wa wilaya;

i) Tabora Igunga mwandishi wa Chanel Ten Jumbe ismail aliswekwa rumande kwa masaa na kwakosa la kurupoti maandamano ya wananchi
ii) Mwandishi wa ITV Kanda ya ziwa Cosmas Makongo alikamatwa tarehe  8/10/2016 kwa amri ya Mkuu wa Wilaya ya Kyerwa Mkoani Kagera, Shaaban Lissu (Mwanahabari mwenzake) baada ya kuripoti janga la njaa iliyokuwa ikiwakabili wananchi wa wilaya hiyo, na baada ya hapo alitakiwa kukanusha habari aliyoiripoti na ndiyo akawekwa lumande kwa takribani saa 2 kabla ya kuachiwa.
iii) Mwandishi wa Radio Free Africa na Gazeti la Mwananchi, Baraka Tiluzilamsomi ambaye alikamatwa 6th /4/2016 na kuwekwa mahabusu kwa saa 7 baada ya amri ya mkuu wa Wilaya ya Chato, Shaaban Ntarambe, aliyedai mwandishi huyo aliingia eneo la hospitali ya wilaya ya Chato bila kupata kibali kutoka kwake.
iv) Mkuu wa Wilaya ya Iringa, Richard Kasesela, aliwakamata waandishi wa habari wa kituo cha Radio Ebony FM cha mjini Iringa na kuwaachia tarehe 1/4/2016 siku baada ya kuwafikisha kituoni.
v) Mkuu wa Wialya ya Kibaha, Assumpter Mshama, alitumia mamlaka yake tarehe 29/11/2016 kumwita mwandishi wa Mwananchi Sanjto Msafiri mbele ya mkutano na kumsuta na huku akimtaka akanushe habari ambayo aliitoa mbele ya wafanyabiashara. Mkuu wa Wilaya alidai taarifa alizotoa mwandishi ni za kumchonganisha na Rais na hakufuraihishwa nazo.
vi) Mkuu wa Wilaya ya Handeni, ambaye aliwahi kuwa mtangazaji wa kituo cha ITV, Godwin Gondwe, aliamuru Polisi kuwasweka ndani waandishi wa habari waliokuwa wakifuatilia tukio la kufukuzwa kwa wachimbaji wadogo 3000 eneo la mlima wa mazigamba Kijiji cha Nyasa, Wilayani humo. Tukio hilo lilitokea 4/11/2016 majira ya saa nane mchana ambapo mwandishi wa Clouds Tv, Saleh Masoud na mwandishi wa Star Tv, Mackdonald walikamatwa na kuwekwa mahabusu kwa saa nane huku mwandishi wa gazeti la Tanzania Daima akifanikiwa kutoroka.

Haya ni baadhi ya matukio yanayodhihirisha kuwa uhuru wa kutafuta na kutoa habari hapa nchini upo shakani kwa sasa. Matumizi haya ya mamlaka ya viongozi kutaka waandishi ama watetetezi wa haki za binadamu kutoa taarifa zitakazowafuraisha au zinazoficha ukweli umejenga hofu kubwa miongoni wa waandishi na watanzania kwa ujumla.

Vitendo hivi vya Wakuu wa Wilaya vinakiuka Katiba ya Jamhuri ya Muungano wa Tanzania, chini ya Ibara ya 18 (kama ilivyorekebishwa mwaka 2005) inatoa haki ya kutafuta, kupokea na kusambaza habari bila kufungwa/kuzuiliwa na mipaka ya kitaifa. Katiba inakataza kuingiliwa kwa mawasiliano binafsi na wakati huo huo ina vifungu vyenye kutoa haki ya kupewa taarifa kwa wakati wote katika matukio mbalimbali ya nchi na duniani kwa ujumla ambayo ni muhimu kwa maisha na shughuli za wananchi na jamii.  Ibara ya 18 ya Katiba imetoa imesisitiza kuwa, kila mtu;
a) Ana uhuru wa kutoa maoni na kueleza mawazo yake;
b) Ana haki ya kutafuta, kupokea na kusambaza taarifa bila kujali mipaka ya kitaifa;
c) Ana uhuru wa kuwasiliana na kupata ulinzi bila ya kuingiliwa mawasiliano yake; na
d)  Ana haki ya kupewa taarifa wakati wote kuhusu matukio mbalimbali muhimu ya maisha na shughuli za watu na pia masuala muhimu kwa jamii.
    Wito wetu;
• Tunawataka viongozi   wanaotumia madaraka yao kwa lengo la kutaka waandishi waandike kile kinachowapendezesha wajirekebishe kwani wanachokifanya ni kinyume na katiba.
• Sheria zote zinatoa mamlaka kwa wakuu Wilaya/Mkoa kuwaweka kuzuizini waandishi ama raia wanaotoa taarifa au maoni kinzani kufutwa katika orodha ya sheria za Tanzania.
• Viongozi watakaona kuwa waandishi wahabari wamewakosea wapeleke malalamiko yao katika Baraza la Habari (MCT), badala ya kuchukua hatua za kuwa walalamikaji, wakamataji na watoa hukumu katika masuala yahusiyo tasnia ya habari.
• Viongozi waache kufanya kazi kwa woga kwa kutaka kuficha taarifa za matatizo ya wananchi kwa kuogopa kutumbuliwa.  Kitendo hiki kinapaswa kukemewa kwani matatizo mengi ya wananchi yatakosa utatuzi kwa hofu za viongozi kuonekana maeneo yao yanamatatizo.
• Tunamshauri Mh, Rais John Pombe Magufuli kuchukua hatua stahiki kwa viongozi watakaonekana kuzuia waandishi wasifanye kazi ya kuhabarisha umma pamoja na ofisi yake matatizo yanayowakumba wananchi
• Serikali ya Awamu ya Tano ambayo imejipambanua kuwa ya wanyonge, haina budi kufanya kazi karibu na waandishi wa habari pamoja watetetezi wa haki za binadamu ili kufikia malengo yake ya kumsaidia mwananchi wa kawaida.
• Tunamtaka Mkuu wa Wilaya ya Arumeru amwachie mwandishi Liundi na kumwomba radhi kwa kumweka ndani bila sababu za msingi. Tunamshauri kama ana malalamiko na Mwandihsi huyo apeleke malalamiko yake MCT.
• Tunawasihi Jeshi la Polisi Wilayani Arumeru kutoa ushirikiano kwa wakili wa Mtandao wa Watetezi wa Haki za Binadamu (THRDC), alietumwa wilaya humo  kwa kazi ya kusimamia maswala yote ya kisheria dhidi ya Khalfani Liundi.

Tamko limetolewa leo tarehe 22/12/2016 na;
Kajubi Mukajanga,
Mkurugeniz Mtendaji-MCT

Deogratius Nsokolo,
Rais Umoja wa Vilabu vya Waandishi Tanzania-UTPC

Onesmo OlengurumwA,
Mratibu Taifa-THRDC

C & P

There was an error in this gadget