Baada ya kumsajili Ameh Ally, Azam wamesema haya….

Ameh Ally (kushoto) akikabidhiwa jezi baada ya kusaini mkataba wa kujiunga na kikosi cha Azam FC

Jana klabu ya Azam FC ilitangaza rasmi kumsajili mshambuliajii wa Mtibwa Sugar Ameh Ally ‘Zungu’ ili kukitumikia kikosi cha wana-lambalamba wa Chamazi kwa msimu ujao. Zungu amesaini mkataba wa miaka miwili kukipiga na Azam na yuko tayari kuanza majukumu yake mapya muda wowote kuanzia sasa kutokana na kila kitu kinachohusu usajili wake kukamilika.

Afisa Habari wa Azam FC Jafar Idd Maganga amesema, Ameh Ally amesajiliwa ikiwa ni moja kati ya wachezaji watano wa ndani ambao wanataka kuwasajili kwa ajili ya kuimarisha kikosi chao ili kupambana na michuano inayowakabili msimu ujao.

“Tumeweza kufanya usajili kwa kumchukua mchezaji kutoka kwenye klabu za ndan,i kama unakumbuka tangu usajili umeanza watu wamekuwa wakifanya usajili wa watu mbalimbali wa klabu za ndani lakini sisi tulikuwa kimya kwa muda mrefu, kwa hiyo tulikuwa tunaangalia tunakwenda wapi, maana  mchezo wa usajili ni mchezo mchafu, ukikosea tu jinsi ya kusajili basi umeua timu kwa msimu mzima. Kwahiyo leo kwa mara ya kwanza tunatangaza katika wachezaji wa ndani tumemsajili Ameh Ally kutoka klabu ya Mtibwa”, amesema Maganga.

“Mazungumzo yamekwenda vizuri kati ya uongozi wa klabu ya Mtibwa na mchezaji mwenyewe, kwahiyo rasmi mchezaji huyo tumemsaini kwa mkataba wa miaka miwili na ataitumikia Azam Football Club kwa kipindi kinachofuata”, ameongeza.

“Kama nilivyozungumza siku za nyuma, hatutakuwa na mabadiliko makubwa sana kwenye timu tunawachezaji ambao ni ‘local’ hawatozidi watano kwenye timu yetu ambao tutaweza kuwaongeza kwenye timu kwa maana ya ku-shape timu na kutafuta wachezaji ambao watakuja kuisaidia timu, sio unatafuta mchezaji ambaye anakuja kuwa mzigo kwenye timu. Mchezaji ambaye anakuwa kwenye benchi muda wote kwa maana yule aliyepo ana afadhali kuliko aliyesajiliwa”, amefafanua.

“Tupo makini sana kwenye hilo, uongozi upo makini sana kushirikiana na benchi la ufundi kuhakikisha kwamba tunasajili watu ambao wanakuja kuisaidia timu na sio kuja kukaa kama mizigo kwenye timu kwa maana kuja kukaa benchi au wengine hata benchi wanashindwa kukaa kwenye wachezaji 16 wanaocheza kwa siku hiyo”, ameongeza.

“Kwahiyo tumemtangaza Ameh Ally aliyekuwa akifatiliwa kwa muda mrefu na benchi la ufundi la timu yetu kuangalia performance yake, sasahivi wamejumuika nae hivyo wameongea na uongozi umetimiza kile ambacho benchi la ufundi limekitaka. Lakini sisi hatuna utaratibu wa uongozi kumsajili mtu wanaemtaka bali anasajiliwa mtu kutokana na benchi la ufundi kutaka. Mchezaji huyo alihitajiwa na timu yetu. Tumeanza na Ameh Ally wengine watafuata na tutakupeni taarifa”, amesema Maganga.

“Wageni wetu (makocha na viongozi wengine) wamewasili na tulikuwa nao kwenye uwanja wa Azam Complex kuweza kuona eneo lao la kazi na wamefurahia mazingira mazuri wametoa ushauri wao kitu gani kiongezwe na vinavyofaa ni vitu vya aina gani kwa hiyo tunashukuru tunakwenda vizuri. Tarehe 15 Juni tunaanza rasmi kuingia katika viwanja vya Azam Complex kuanza mazoezi kwa maana tunamashindano ya Kagame, lakini vilevile tuna ligi kuu Tanzania bara”.

“Stewart Hall ni kocha ambaye anafahamu mazingira ya timu yetu, anafahamu wachezaji kwahiyo,  mazoezi yataanza kwa wale ambao hawako kwenye timu ya Taifa na baadae wale waliopo kwenye timu ya Taifa watakapokuja wataungana na wenzao kuendelea na mazoezi kwa pamoja”, Maganga alimaliza.