Zoezi la uandikishaji wapiga kura kuendelea kwa amani bila polisi kwaipa Chadema hoja kuwa hawaitajiki wakati wa kupiga kura

.

Chama cha demokrasia na maendeleo chadema kimeitaka serikali pamoja na tume ya taifa ya uchaguzi,ipate fundisho kufuatia zoezi linaloendelea hivi sasa nchini la uandikishaji wa daftari la kudumu la wapiga kura,ambapo wananchi wanajisimamia wenyewe bila ya kuwepo kwa askari polisi vituoni, na zoezi linaendelea kwa utulivu na amani, hali inayoashiria kuwa askari hao ndio wanakuwa chanzo cha uvunjifu wa amani wakati wa zoezi la kupiga kura vituoni.

Katibu mkuu wa chama cha demokrasia na maendeleo CHADEMA Dakta.Wilbroad Slaa,akiongea na wakazi wa mji wa Namanyere wilayani Nkasi mkoani Rukwa,amesema haoni kwanini kunakuwa na lundo la askari polisi kwenye vituo vya kupigia kura ambalo ni zoezi la kidemokrasia, hali ambayo mara nyingi inaishia kusababisha vurugu na kuwaacha watu wengi wakipoteza maisha na wengine kuwa walemavu, kama katika chaguzi nyingi zilizopita ikiwa ni pamoja na ule wa serikali za mitaa mwishoni mwa mwaka jana. 

 

Aidha katibu mkuu huyo amewataka wananchi waendelee kujitokeza kwa wingi kujiandikisha kwenye daftari hilo,ili waweze kuitumia haki yao ya kimsingi ya kupiga kura, na kwamba wasitegemee hata siku moja kama tume hiyo itawafuata majumbani mwao kuwalazimisha kwenda kujiandikisha.