LWASYE NEWS

Watuhumiwa kesi mauaji ya Kamanda Barlow warejeshwa rumande

Watuhumiwa saba katika kesi ya mauaji ya aliyekuwa Kamanda wa Polisi Mkoa wa Mwanza, Liberatus Barlow, kwa mara nyingine jana walifikishwa katika Mahakama ya Hakimu Mkazi jijini hapa na kisha kurejeshwa rumande. Waliofikishwa mahakamani hapo jana ni mtuhumiwa namba moja, Muganyizi Michael (36), ambaye ni mkazi wa Nyakabungo na Magige Mwita Marwa, maarufu kama “Tatoo” (48) mkazi wa Bugarika, jijini hapa. 

Wengine ni Abdalah Petro anayefahamika pia kwa jina la “Amos Abdalah” (32), ambaye ni mkazi wa Mjimwema, Abdulrahman Ismail (28), ambaye ni mkazi wa Mkudi, jijini hapa, Chacha Wekena Mwita (50), ambaye ni mkazi wa Gongolamboto, Buganze Edward Luseta (22), ambaye ni mkazi wa Tandika na Bhokle Marwa Mwita (42), ambaye ni mkazi wa Mombasa Ukonga, jijini Dar es Salaam.

Watuhumiwa hao, ambao wengi wao walionekana kudhoofu kiafya, walifikishwa mbele ya Hakimu Mkazi wa Mahakama hiyo, George Mwambapa, na kesi yao ilitajwa tu na kisha kupangiwa tarehe nyingine ya kutajwa tena.

Kesi hiyo, ambayo upelelezi wake ulielezwa kuwa bado haujakamilika, imepangwa kutajwa tena Januari 24, mwaka huu, na watuhumiwa wamerejeshwa rumande.

Kama ilivyo ada, watuhumiwa hao walifikishwa mahakamani hapo wakiwa wamefungwa pingu wawili wawili, huku wakiwa chini ya ulinzi wa askari polisi.

Hata hivyo, tofauti na huko nyuma, ambako watuhumiwa hao walikuwa wakifikishwa mahakamani hapo kwa heka heka nyingi, huku wakisindikizwa na idadi kubwa ya askari polisi wenye bunduki, jana walionekana kusindikizwa katika chumba cha mahakama na askari watatu pekee, huku mmoja tu ndiye alikuwa na bunduki.

Katika kesi hiyo watuhumiwa hao kwa pamoja wanadaiwa kuwa Oktoba 13, mwaka jana, majira ya kati ya saa 7:00 na saa 8:00 usiku, katika eneo la Minazi Mitatu Kitangiri, Wilaya ya Ilemela, jijini Mwanza, walimuua kwa kumpiga risasi Barlow.