Maalim Seif atoa ya moyoni Dar

LICHA ya Chama cha Wananchi (CUF) kudai mara kwa mara kuwa kilishinda uchaguzi wa Urais mwaka 2010 visiwani Zanzibar, Katibu Mkuu wake Maalim Seif Sharif Hamad, amekiri kuwa hawana ushahidi stahiki wa kuthibitisha ushindi huo.

Kiongozi huyo ambaye pia ni Makamu wa Kwanza wa Rais Zanzibar, amekiri wazi kuwa na nia ya kuwania nafasi ya Urais visiwani humo katika uchaguzi mkuu wa mwaka huu na kusisitiza kuwa ataeleza sababu na maandalizi yake ya nia hiyo hivi karibuni.

Maalim Seif aliyasema hayo Dar es Salaam jana wakati akizungumza na waandishi wa habari kuhusu maandalizi ya uandikishwaji wapiga kura wapya visiwani humo katika daftari la wapiga kura, unaotarajiwa kuanza rasmi Mei 16 hadi Juni 25, mwaka huu.

"Uchaguzi wa mwaka 2010 ulifanyika mara baada ya Wazanzibari kuamua tuwe na maridhiano, hivyo uchaguzi ule kwa kiasi kikubwa ulikuwa huru na wa amani na katika kampeni hakuna hata nzi aliyebanwa," alisema Maalim seif.

Alisema baada ya kupiga kura katika uchaguzi huo, muasisi mmoja wa maridhiano hayo ambaye wakati huo alikuwa bado Rais wa Zanzibar, Amani Abeid Karume, alimtumia mjumbe ambaye alimsisitizia juu ya umuhimu wa kuzingatia maridhiano yaliyopo na maslahi ya nchi hasa amani.

Alisema kwa mujibu wa mzee huyo aliyetumwa na Rais Karume, alimtaka Maalim Seif na CUF kwa ujumla pindi matokeo yatakapotoka kutoendeleza mvutano.

"Hata hivyo hakukua na haja ya mvutano kwani Tume ya Uchaguzi Zanzibar (ZEC) ilipotangaza matokeo, tuliwasilisha hoja yetu kuwa tumeshinda, tume ikatutaka tuwasilishe (result slip) nakala za matokeo ili kuthibitisha madai yetu," alisema.

Hata hivyo, alisema chama hicho kilishindwa kuwasilisha nakala zote za matokeo na hivyo kukosa ushahidi kutokana na baadhi ya mawakala wa chama hicho kuwaangusha kwa kukosa nakala hizo.

"Hivyo hiyo hoja kwamba nishauriwa nimuachia ushindi Rais wa Zanzibar Dk Ali Mohamed Shein, haikuwa na sababu kwa kuwa hatukuwa na ushahidi wa kuniwezesha kuthibitisha ushindi wangu," alisisitiza.

Alisema katika uchaguzi unaotarajiwa kufanyika Oktoba 25, mwaka huu, chama hicho kimejipanga na kuhakikisha kinakuwa na mawakala waaminifu na na watendaji.

Maalim Seif alianza kugombea urais visiwani Zanzibar kwa mara ya kwanza mwaka 1995 baada mfumo wa vyama vya vingi kurejeshwa rasmi, lakini alishindwa.

Aligombea nafasi hiyo tena mwaka 2000, 2005 na 2010, ambako kote alishindwa na nafasi hiyo kuchukuliwa na CCM.

Awali, akizungumzia maandalizi ya uandikishaji wapiga kura katika daftari la kudumu, kiongozi huyo aliitaka ZEC kuhakikisha, inahakiki kwanza daftari la wapigakura la mwaka 2010 na kuondoa majina ya wale wote wasiostahili na kuandikisha wapigakura wapya wanaostahili.

"Katika utafiti tulioufanya chini ya kitengo cha Sera, Utafiti na Mafunzo cha CUF kupitia daftari la kudumu la wapigakura la mwaka 2010 na 2013, tulibaini takribani wapiga kura 10,000 waliandikishwa isivyostahili," alisema.

Alisema anaamini kuwa kasoro zote zilizojitokeza katika daftari hilo na uchaguzi kwa ujumla, zinaweza kufanyiwa kazi na Tanzania ikafanya uchaguzi wake kwa amani na kuwa mfano barani Afrika.

Alionya dhidi ya vitendo vya ubabe, vurugu na hadaa za baadhi ya vyama kwa ajili ya kujihakikishia ushindi kuwa ni chanzo kikubwa cha kuvurugika kwa amani kama ilibyotokea Zanzibar mwaka 2005 jambo ambalo linahitaji kukemewa.

"Lazima tutambue kuwa kila mtanzania ana haki ya kugombea na kuchaguliwa, ni vyema sote tukakubali kuwa hakuna mwenye hati miliki na haki ya nchi hii pekee. Tuheshimu matakwa ya wananchi," alisema.

Alisema ili kuepusha nchi na vurugu wapigakura wote haramu waliopatiwa vitambulisho vya uzanzibari kinyume na Sheria wanyang'anywe vitambulisho hivyo na watu wote wenye haki ya kupatiwa vitambulisho vya ukaazi Zanzibar wapewe kabla tarehe ya uandikishwaji haijaanza.

Aidha, alivitaka vikosi vya ulinzi na sualama ikiwemo Jeshi la Ulinzi la Wananchi (JWTZ) na Idara Maalum Zanzibar, viache kutumiwa kisiasa na kwenda kinyume na Sheria zinazoongoza kazi zao, idara zote za usajili ikiwemo ZEC nazo zijiepushe kutumika kisiasa ikiwemo Jeshi la Polisi.CHANZO: HABARI LEO (Muro)